١٠
١ ای برادرلر بنم قلبمك آرزوسی و انلر ایچون اللهه نیازم خلاص بولملریدر٢ زیرا حقلرنده شهادت ایدرمكه انلرده الله غیرتی وار لكن علم جهتیله دكلدر٣ چونكه انلر اللهك اظهار ایلدیكی صلاحی بیلمیوب كندیلرینك صلاحنی ثابت ایتمكه جهد ایتملریله اللهك صلاحنه مطیع اولمادیلر٤ زیرا هر ایمان ایدنه صلاحی موجب اولمق اوزره شریعتك نهایتی مسیحدر.٥ چونكه موسی شریعتدن اولان صلاح حقنده بو شیلری اجرا ایدن ادم بونلرله یاشایه‌جقدر دیو یازار٦ اما ایماندن اولان صلاح بیورر كه كندی قلبكده دیمیه‌سین كه سمایه كیم چیقه‌جقدر (یعنی مسیحی ایندرمك ایچون)٧ یاخود هاویه‌یه كیم اینه‌جكدر (یعنی مسیحی اولولردن چیقارمق ایچون)٨ اما نه دیور. كلام (یعنی وعظ ایتدیكمز ایمان كلامی) سڭا یاقیندر آغزكده و قلبكده‌در.٩ شویله كه عیسانك رب ایدیكنی آغزكله اقرار ایدوب الله انی اولولردن احیا ایتدیكنه قلبكله اینانور ایسه‌ك خلاص بوله‌جقسین.١٠ چونكه صلاح ایچون قلبله ایمان و خلاص ایچون آغزله اقرار ایدیلور١١ زیرا كتاب اڭا هر كیم ایمان ایدرسه خجل اولمایه‌جقدر بیورر١٢ چونكه یهودی ایله یونانینك فرقی یوقدر زیرا جمله‌نك ربی كندیسی اولوب كندینه دعا ایدنلرك جمله‌سنه غنیدر١٣ زیرا هر كیم ربك اسمنه دعا ایدر ایسه خلاص بوله‌جقدر.١٤ ایمدی ایمان ایتمدكلری ذاته نصل دعا ایده‌جكلر و حقّنده ایشیتمدكلری ذاته نصل ایمان ایلیه‌جكلر و وعظ ایدن یوغیكن نصل ایشیده‌جكلر١٥ و ارسال اولنمادقجه نصل وعظ ایده‌جكلر نته كیم سلامت تبشیر ایدنلرك خیرلو شیلر تبشیر ایدنلرك ایاقلری نه كوزلدر دیو یازلمشدر١٦ لكن بشارته جمله‌سی اطلاعت ایتمدی زیرا اشعیا یا رب ویردیكمز خبره كیم ایناندی دیر١٧ ایمدی ایمان ایشیتمكدن و ایشیتمك مسیحك كلامی واسطه‌سیله اولور١٨ لكن ایشیتمدیلرمی دیرم. بلی انلرك صداسی بتون زمینه و كلاملری دنیانك منتهالرینه قدر چیقدی١٩ ینه اسرائیل بیلمدیمی دیرم. اوّلا موسی بن سزی قوم اولمایانله غیرته تشویق و فهمسز طائفه ایله غضبه تحریك ایده‌جكم دیو سویله‌دی٢٠ اما اشعیا نبی ارامیانلر طرفندن بن بولندم بنی طلب ایتمیانلره ظاهر اولدم دیو جسورانه بیورر٢١ و اسرائیل حقنده بتون كون اللرمی عای و معترض بر قومه اوزاتدم دیو بیورر.