٩
١ مسیحده حقیقت سویلرم یالان سویله‌م (بڭا ضمیرم دخی روح القدسله شاهددر)٢ كه عظیم حزنم و قلبمده دوكنمز دردم واردر.٣ زیرا برادرلرم یعنی تن جهتیله اقربامك یرینه بن كندم مسیحدن محروم اوله‌یم دیو آرزو ایدر ایدم٤ انلر اسرائیللو اولوب اوغللق و جلال و عهدلر و شریعتك ویرلمسی و عبادت و وعدلر انلركدر.٥ بابالر دخی انلرك اولوب مسیح دخی تن جهتیله انلردندر جمله‌نك اوزرینه او الی الابد الله مباركدر آمین٦ اما اللهك كلامی یره دوشدی دیمك دكلدر زیرا بنی اسرائیلدن اولانلرك جمله‌سی اسرائیل اوغوللرینی دكلدر٧ همده ابراهیم نسلی اولدقلری ایچون جمله‌سی اولاد دكل فقط سڭا اسحقدن نسل عدّ اولنه‌جقدر دینلدی٨ یعنی تن جهتیله اولاد اولانلر اللهك اولادی اولمایوب آنجق وعد جهتیله اولان اولاد نسل صایلور٩ زیرا وعدك كلامی بو ایدی یعنی بو وقتده كله‌جكم و ساره‌یه بر اوغل اوله‌جقدر١٠ و یالڭز بو دكل اما ربقا دخی بر ذاتدن یعنی پدرمز اسحقدن حامله اولدیغی حالده١١ چوجوقلر دها طوغمازدن و بر خیر یا شر ایشلمزدن اوّل اللهك كندی انتخابیله تقدیرینك (عمللردن اولمایوب انجق دعوت ایدندن ایدیكی) ثابت اولمسی ایچون١٢ مرقومه‌یه بیوكی كوچوكنه قوللق ایده‌جكدر بیورلدی١٣ نته كیم یعقوبی سودم عیسوه ایسه بغض ایتدم دیو یازلمشدر.١٤ ایمدی نه دیه‌لم. اللهده حقسزلق وارمیدر حاشا١٥ چونكه موسایه خطاباً مرحمت ایده‌جكمه مرحمت ایدرم و شفقت ایده‌جكمه شفقت ایدرم دیو بیوردی١٦ بو تقدیرده استیانك یاخود قوشانك النده دكل آنجق مرحمت ایدن اللهك النده‌در١٧ زیرا كتاب فرعونه سنی همان بونڭ ایچون یعنی سنده قدرتمی اظهار ایتمك و اسمم بتون زمینده اعلان اولنمق ایچون اقامه ایلدم دیو بیورر١٨ بوكا بناءً استدیكنه مرحمت ایدر و استدیكنی قاتیلاشدرور١٩ ایمدی بڭا دیه‌جكسین كه دها نیچون قباحت بولور زیرا انك مرادینه كیم مقاومت ایتمشدر٢٠ و لكن ای ادم سن كیم سین كه اللهه اعتراض ایدرسین. یاپی یاپیجیسنه نبی نیچون بویله یاپدك دیه‌بیلورمی.٢١ بر خمیردن بر قاب عزت ایچون دیكر برینی دخی حقارت ایچون یاپمغه چو ملكجینك بالچق اوزرینه قدرتی یوقمی٢٢ ایمدی اگر الله غضبنی كوسترمك و قدرتنی بیلدرمك مرادیله هلاكه حاضر اولان غضب قابلرینه چوق صبرله تحمل ایتدی٢٣ و مقدّما عزته حاضرلادیغی مرحمت قابلری٢٤ یعنی بز یالڭز یهودیلردن دكل اما طائفه‌لردن دخی دعوت ایتدیكی كیمسه‌لر حقّنده عزتنك غنیلكنی بیلدرمك استدی ایسه نه دیه‌لم٢٥ نته كیم هوشع كتابنده قومم اولمایانه قومم و سوكیلو اولمایانه سوكیلو دیه‌جكم٢٦ و واقع اوله كه سز قومم دكلسڭز دینلدیكی محلده اوراده حی اولان اللهك اوغللری تسمیه اولنه‌جقلر دیو بیورر٢٧ و اشعیا اسرائیلك حقنده ندا ایدر كه اگر بنی اسرائیلك عددی دكزك قومی قدر اولسه آنجق بقیه‌سی خلاص بوله‌جقدر٢٨ زیرا عدالت اوزره امری قیصالدوب تكمیل ایده‌جكدر چونكه رب یر اوزرنده مختصر امری اجرا ایده‌جكدر٢٩ و دخی اشعیا مقدّما بیوردیغی كبی اگر رب الجنود بزه نسل براقماسیدی سدوم كبی اولوب غموره‌یه بكزه‌مش اولور ایدك.٣٠ ایمدی نه دیه‌لم صلاحی تعقیب ایتمیان طائفه‌لر صلاحه یعنی ایمان اولان صلاحه نائل اولدیلر٣١ و لكن اسرائیل اوغوللرینی صلاح قاعده‌سنی تعقیب ایدر ایكن صلاح قاعده‌سنه نائل اولمادی٣٢ نیچون. زیرا ایمانله دكل كویا شریعت عمللریله ارادی چونكه اول توڭز طاشنه چارپدیلر٣٣ نته كیم اشته صهیونده بر توڭز طاشی و بر سورچمه قیاسی قورم و اڭا هر ایمان ایدن خجل اولمایه جقدر دیو یازلمشدر.