٨
١ ایمدی [تنجه یورومیوب] عیسی المسیحده اولانلر علیهنده شمدی هیچ بر حكم یوقدر٢ چونكه عیسی المسیحده اولان حیات روحنك قانونی نبی كناه و اولوم قانونندن آزاد ایلدی٣ زیرا شریعت تن سببیله عاجز اولدیغی حالده اجرا ایده‌مدیكنی الله كندی اوغلنی كناهلو تن مشابهتنده و كناهدن طولایی ارسال ایدوب كناه علیهنه تنده حكم ایده‌رك اجرا ایلدی٤ تا كه شریعتك احكامی بزده یعنی تنجه دكل آنجق روحجه یوریانلرده اتمام اولنه.٥ زیرا جسمانی اولانلر جسمانی اموره و روحانی اولانلر روحانی اموره صرف افكار ایدرلر٦ زیرا جسمانی افكار اولومدر اما روحانی افكار حیات و سلامتدر٧ چونكه جسمانی افكار اللهه عداوتدر زیرا اللهك شریعتنه اطاعت ایتمز و همده ایده‌مز٨ ایمدی جسمانی اولانلر اللهه مقبول اوله‌ماز٩ لكن اللهك روحی سزده ساكن اوادیغی تقدیرده سز جسمانی دكلسڭز آنجق روحانی سڭز و اگر بر كیمسه‌ده مسیحك روحی یوغیسه اول كیمسه انك دكلدر١٠ و اگر مسیح سزده ایسه فی الواقع جسد كناه سببندن اولودر اما روح صلاح سببندن حیاتدر.١١ و اگر عیسایی اولولردن احیا ایدنك روحی سزده ساكن ایسه مسیحی اولولردن احیا ایدن سزده ساكن اولان كندی روحی واسطه‌سیله سزڭ فانی جسدلركزی دخی دیرلده‌جكدر.١٢ ایمدی ای برادرلر بو صورتده تنجه یاشامق ایچون تنه بورجلو دكل ایز١٣ زیرا اگر تنجه یاشار ایسه‌ڭز اوله‌جكسڭز اما اگر روحله جسمانی عمللری اولدرر ایسه ڭز یاشایه‌جقسڭز١٤ زیرا اللهك روحی كیملره دلالت ایدر ایسه اللهك اوغللری انلردر١٥ زیرا سز تكرار قورقویه سبب اولان اسیرلك روحنی آلمادیڭز آنجق اوغللق روحنی آلدیڭز كه انكله ابا پدر دیو ندا ایدرز١٦ اول روح كندیسی بزم اللهك اولادی اولدیغمزه روحمز ایله برابر شهادت ایدر١٧ و اگر اولاد ایسه‌ك كذلك وارثلر ایز اللهك وارثلری و مسیحك میراث شریكلری ایز تا كه انك ایله برابر الم چكدیكمز صورتده برابر دخی جلاله نائل اوله‌لم.١٨ زیرا حساب ایدرمكه شمدیكی زمانك المللری بزم ایچون كشف اولنه‌جق جلاله قیاساً بر شی دكلدر١٩ چونكه مخلوق كمال حسرتله اللهك اوغللرینك كشف اولنمسنه منتظردر٢٠ زیرا مخلوق كندی ارادتیله دكل آنجق كندیسنی تابع ایتدرانك سببندن باطللغه تابع اولدی٢١ بو امیدله كه مخلوق دخی بالذات فسادك قوللغندن قورتیلوب اللهك اولادینك جلیل حرّیتنه نائل اوله٢٢ چونكه مخلوقك كافه‌سی شمدی‌یه دكین برلكده آه ایله آغری چكدیكنی بیلورز٢٣ و یالڭز بو دكل آنجق بز كه روحك ایلك میوه‌سنه مالك ایز اوغللغه یعنی جسدمزك خلاصنه منتظر اوله‌رق بز بالذات درونمزده آه چكرز.٢٤ زیرا امیدله خلاص بولدق لكن كورینان امید امید دكلدر زیرا بر كیمسه كوردیكی شیئه دها نه ایچون امید ایدر٢٥ لكن اگر كورمدیكمز شیئه امید ایدر ایسه‌ك صبرله بكلرز٢٦ و كذلك روح دخی ضعیفلكرمزه معاونت ایدر زیرا واجب اولدیغی كبی نصل دعا ایده‌جكمزی بیلمیورز اما روح كندیسی كلامله بیان اولنماز آهلرله بزم ایچون شفاعت ایدر٢٧ و قلبلری تفتیش ایدن دخی مقدّسلر ایچون اللهك ارادتنه كوره شفاعت ایتدیكندن روحك مرادی نه ایدیكنی بیلور.٢٨ و تقدیری اوزره دعوت اولنوب اللهی سونلرك ایولكی ایچون هر شیئڭ برلكده ایشلدیكنی بیلورز٢٩ زیرا ازلدن بیلدیكی كیمسه‌لری كندی اوغلنك صورتنه مشابه اولمغه تقدیر ایلدی تا كه چوق برادرلر اراسنده او ایلك اوله٣٠ و تقدیر ایتدیكی كیمسه‌لری دعوت ایلدی و دعوت ایتدیكی كیمسه‌لری تبریر ایلدی و دخی تبریر ایتدیكی كیمسه‌لری تعزیز ایلدی٣١ ایمدی بو شیلره نه دیه‌لم الله بزم ایله اولدیغی تقدیرده علیهمزده كیم اوله‌بیلور٣٢ كندی اوغلنی اسركمیوب انی بزم جمله‌مز ایچون تسلیم ایلیان انك ایله برابر هر شیئی دخی بزه نصل احسان ایتمیه‌جكدر٣٣ اللهك منتخبلرینی كیم تهمتلو چیقاره‌جقدر. تبریر ایدن اللهدر٣٤ علیهلرنده حكم ایدن كیمدر. وفات ایدوب خصوصا قیام ایدن و اللهك صاغنده اولوب بزم ایچون شفاعت ایدن دخی مسیحدر٣٥ بزی مسیحك محبتندن كیم آیره‌جقدر الم‌می مضایقه می تعدّی می اجلق می چیلاقلق می مخاطره می قلیچ می٣٦ نته كیم سنڭ ایچون هر كون قتل اولنورز. بوغازلنه‌جق قویونلر حسابنده ایز دیو یازلمشدر٣٧ اما بونلرك جمله‌سنده بزی سونك واسطه‌سیله بالكلیه غالب اولورز٣٨ زیرا صحیحاً بیلورمكه نه اولوم نه عمر نه ملكلر نه رئیسلر نه قوتلر نه حاضر نه كله‌جك شیلر٣٩ نه یوكسكلك نه درینلك نه بشقه بر مخلوق ربمز عیسی المسیحده اولان اللهك محبتندن بزی آیرمغه قادر اولمایه‌جقدر.