٢٥
١ ایمدی فستوس ولایته واصل اولوب اوچ كون صكره قیصریه‌دن اورشلیمه چیقدی٢ و كاهن اعظم ایله یهودیلرك معتبرانی پولس علیهنده شكایت ایدوب رجا ایده‌رك٣ انك اورشلیمه جلبی ایچون مساعده طلب ایلدیلر. كندیلر ایسه انی یولده اولدرمك ایچون طوزاق قوریورلر ایدی٤ لكن فستوس جواباً پولس قیصریه‌ده تحت محافظه‌ده بولنوب كندیسی دخی یاقینلرده اورایه كیده‌جكنی بیان ایده‌رك٥ اراكزدن مقتدر اولانلر بنم ایله برابر اینوب اول ادمده بر قباحت وار ایسه انی اتهام ایتسونلر دیدی٦ و یانلرنده آنجق سڭز اون كون اكلند كدنصكره قیصریه‌یه ایندی و ایرتسی كون محكمه‌ده اوتوروب پولسك كتورلمسنی امر ایلدی٧ او دخی كلدیكنده اورشلیمدن اینن یهودیلر انك اطرافنده طوروب انك علیهنده اثباتنه قادر اولمادقلری چوق و آغز شكایتلر ایتدیلر ایسه‌ده٨ او دخی بن نه یهودیلرك شریعتنه و نه هیكله و نه‌ده قیصره قارشو بر جرمده بولندم دیو جواب ویردی٩ لكن فستوس یهودیلرك خاطرینی خوش ایتمك مقصدیله پولسه جواب ویروب سن اورشلیمه چیقوب بو شیلر ایچون بنم حضورمده اوراده محاكمه اولمق استرمیسین دیدی١٠ پولس دخی بن قیصرك محكمه‌سنده طوریورم بوراده محاكمه اولنمقلغم كركدر سنڭ دخی پك ایو بیلدیكك كبی یهودیلره هیچ بر حقسزلق ایتمدم١١ زیرا اگر حقسزلق و قتله مستحق بر شی ایشلمش ایسه‌م اولمكدن چكینمم اما اگر بونلرك علیهمده شكایت ایتدكلری شیلرك اصلی یوق ایسه هیچ بر كیمسه نبی انلره تسلیم ایده‌مز قیصره رفع دعوی ایدرم دیدی١٢ او زمان فستوس مجلس ایله مذاكره ایتدكدنصكره قیصره رفع دعوی ایتدك قیصره كیده‌جكسین دیو جواب ویردی.١٣ و بر قاچ كون مرورندنصكره فستوسی تبریك ایتمك اوزره اغریپاس ملِك ایله برنیقه قیصریه‌یه واصل اولدی١٤ و اوراده بر چوق كونلر اكلندكلرنده فستوق پولسك ماده‌سنی ملِكه افاده ایدوب دیدیكه فلیكسك محبوس براقدیغی بر ادم واردر١٥ بو ادمك حقنده بن اورشلیمده ایكن یهودیلرك باش كاهنلری ایله اختیارلری اندن طولایی بڭا شكایت عرض ایدوب انك علیهنده حكم طلب ایتدیلر١٦ بن دخی مدعی علیه مدعیلر ایله یوز یوزه بولنوب شكایتلرینه جواب ویرمكه مساعده اولماینجه بر كیمسه‌یی [قتله] تسلیم ایتمك رومالولرك عادتی دكلدر دیو انلره جواب ویردم١٧ بونڭ أوزرینه انلر بورایه بنم ایله واصل اولدقلرنده كجكدرمیه‌رك ایرتسی كون محكمه‌ده اوتوروب اول ادمك كتورلمسنی امر ایتدم١٨ و دعواجیلری حضورده انك حقنده بنم قیاس ایتدیكم بر شكایت ایتمدیلر١٩ فقط كندی دیانتلرینه و پولسك دیری‌در دیدیكی عیسی نامنده وفات ایتمش بر كیمسه‌یه دائر انك علیهنده بعض مسئله‌لری وار ایدی.٢٠ و بن بو مسئلهك‌نك حلنده تردد ایتدیكمدن كندیسنه اورشلیمه گیدوب بو شیلردن طولایی اوراده محاكمه اولمق استرمیسین دیدم.٢١ و لكن پولس اوغوستوسك حكمنه براغلمق اوزره رفع دعوی ایتدیكنده بن انی قیصره كوندرنجه‌‌یه دكین حفظ اولنمسنی امر ایتدم٢٢ و اغریپاس فستوسه بن‌كندم دخی بو ادمی دیكله‌مكه آرزو ایدیورم دیدكده یارین انی دیكلرسین دیدی.٢٣ ایرتسی كون اغریپاس ایله برنیقه كمال احتشامله گلوب بیك باشیلر و شهرك رجال و كباری ایله برابر دیوانخانه‌یه كیردكدنصكره فستوسك امری اوزرینه پولس كتورلدی٢٤ و فستوس دیدیكه ای ملِك اغریپاس و بزم ایله حاضر بولنان جمله رجال بونی كور یوسڭز یهودیلرك بتون جمهوری اورشلیمده و بوراده یانمه گلوب بونڭ حقنده ارتق صاغ قالمسی جائز دكلدر دیو چاغررلر ایدی٢٥ لكن بن انك قتله مستحق بر شی ایتمدیكنی اكلایوب كندیسی دخی اوغوستوسه رفع دعوی ایتدیكندن انی كوندرمكه حكم ایتدم٢٦ اما انك حقنده افندمزه یازه‌جق بر تحقیق اولنمش شیئم اولمادیغندن انی سزڭ حضوركزه و باخصوص ای ملِك اغریپاس سنڭ حضوركه كتوردم كه استنطاق اولندقدن صكره بر یازه‌جغم اوله٢٧ زیرا بر محبوس كوندروب علیهنده اولان شكایتلری دخی بیان ایتمه‌مك بڭا نامعقول كورینور.