١ عیسی المسیحك قولی پولس رسول اولمق اوزره دعوت ٢ و اللهك بشارتنه تخصیص اولنمش اولوب ٣ اول بشارتی كه جسد جهتیله داود نسلندن اولوب قدسیت روحی جهتیله اولولردن بالقیام قوّتله ابن الله بیان اولنان كندی اوغلی ربمز عیسی المسیح حقنده ٤ الله مقدّس كتابلرده پیغمبرلری واسطه‌سیله مقدما وعد ایلمشدر. ٥ ارالرنده عیسی المسیحك دعوتلوسی بولندیغڭز ٦ جمله ملتلر اراسنده اسمی ایچون ایمانه اطاعت اولنمق اوزره انك طرفندن عنایت و رسالت آلدق ٧ سز اللهك روماده بولنان جمله سوكیلولرینه و مقدّس اولمق اوزره دعوت اولنانلره پدرمز الله و رب عیسی المسیح طرفندن عنایت و سلامت اولسون. ٨ اوّلا جمله‌ڭز ایچون عیسی المسیح واسطه‌سیله اللهمه شكر ایدرمكه ایمانڭز بتون دنیایه شایع اولمشدر ١٠ زیرا اوغلنك بشارتنده روحمله خدمت ایتدیكم الله بڭا شاهددركه ١١ اللهك ارادتیله عاقبت طرفكزه كلمكلكم میسر اوله دیو دائما دعالرمده نیاز ایدوب فراغت ایتمیه‌رك سزی یاد ایدرم ١٢ چونكه سزی كورمكه اشتیاقم‌وار تا كه ثباتڭز ایچون سزی بر روحانی موهبه‌یه نائل ایده‌یم ١٣ یعنی سزڭ و بنم اولوب بری برمزده بولنان ایمانله سزڭ ایله برابر متسلی اوله‌یم ١٤ لكن ای برادرلر شمعدی‌یه‌دك منع اولندم ایسه‌ده سائر طائفه‌لر اراسنده اولدیغی كبی سزڭ اراكزده دخی بر محصولم اولمق اوزره طرفكزه كلمكه دفعاتله مراد ایلدیكمی بیلمه‌مكزی استمم ١٥ بن یونانیلره و باربارلره عالملره و جاهللره بورجلو ایم ١٦ كذلك المدن گلدیگی قدر سزه یعنی روماده بولنانلره دخی بشارتی تبشیر ایتمك ایچون حاضر ایم ١٧ چونكه [مسیحك] بشارتندن طولایی اوتانمام زیرا هر ایمان ایدنه اوّلا یهودی‌یه همده یونانی‌یه خلاص ایچون اللهك قوتیدر ١٨ زیرا انك واسطه‌سیله اللهك اظهار ایلدیكی صلاح یعنی ایماندن اولان صلاح ایمان ایچون كشف اولنمشدر نته‌كیم صالح ایمانله یاشایه‌جقدر دیو یازلمشدر. ١٩ زیرا حقیقتی حقسزلقله آلیقویان ادملرك هر فسقی و حقسزلغی أوزرینه اللهك غضبی سمادن كشف اولنور ٢٠ زیرا الله حقّنده بیلنمسی ممكن اولان شیلر انلرده ظاهردر چونكه الله انلره اظهار ایلمشدر ٢١ زیرا كورونمیان صفتلری یعنی ابدی قدرتی و الوهیتی عالم خلق اولنه‌لیدنبرو ایشلری واسطه‌سیله درك اولنه‌رق اشكاره كورینور شویله كه انلر معذور اوله‌مازلر ٢٢ چونكه اللهی بیلدكلری حالده اللهه واجب اولان مجد و شكری ایتمیوب آنجق كندی فكرلرنده بطالته دوچار اوله‌رق فهمسز قلبلری قراردی ٢٣ عالم ایز دیرلر ایكن احمق اولدیلر ٢٤ و زوالدن منزه اولان اللهك جلالنی زوال بولان انسان و قوشلر و درت ایاقلولر و حشرات صورتنك مشابهتنه تبدیل ایتدیلر. ٢٥ بو اجلدن الله دخی انلری قلبلرینك شهوتلریله جسدلرینی ارالرنده رذیل ایتمك ایچون ناپاكلكه تسلیم ایلدی ٢٦ انلر كه اللهك حقیقتنی یالانه تبدیل ایده‌رك مخلوقه خالقدن زیاده احترام و عبادت ایتدیلر. او الی‌الابد مباركدر آمین ٢٧ بو سببدن الله انلری قیچ هوسلره تسلیم ایلدی زیرا انلرك نساسی دخی طبیعی استعمالی طبیعته مخالف اولانه تبدیل ایتدیلر ٢٨ كذلك ارككلر دخی نسانك طبیعی استعمالنی تركله‌كندی شهوتلرنده بری بریله قیزشوب اركك اركك ایله فحشیات ایشلیه‌رك نفسلرنده كندی ضلالتلرینه لایق اولان جزایی بولدیلر ٢٩ و بیلكیلرنده اللهك بولنمسنی مقبول طوتمادقلرندن الله دخی لایق اولمایان شیلری ایشلمك اوزره انلری نا مقبول ذهنه تسلیم ایلدی ٣٠ شویله كه انلر هر درلو حقسزلقدن زنا و كوتولك و طمع و شرارتدن طولو و حسد و قتل و نزاع و حیله و كملكله مملودرلر ٣١ غماز غیبت ایدیجی اللهه بغض ایدیجی شتم ایدیجی مغرور مفتخر شرّ ایجاد ایدیجی والدینه اطاعتسز فهمسز عهد بوزیجیلر مودتسز مصالحه قبول ایتمز و مرحمتسزدرلر ٣٢ و بو مثللو شیلری ایشلیانلرك اولومه مستحق اولدقلری حقّنده اولان حكم اللهی بیلدكلری حالده بو شیلری كندیلر ایشلد كدن بشقه ایشلیانلره دخی رضا ویررلر.