٣٥
و موسى إسرائيلن اوشاخلرنن بوتون إجتماعسني توپلادي و اونلره ﴿ربن امر اتديي سوزلر بودر و اونلري ياپمالينز ٢ التي گون إيشلەيِن و يدنجي گون سزن إيچن ربن مقدس إرحتلخ سبت گونو اولسن۔ هر کيم او گون إيشلەديسه اؤلدرلسن۔ ٣ سبت گونو هيچ بير مسکننزده اتش ياخماين۔﴾ ددي٤ و موسى إسرائيلن اوشاخلرنن بوتون إجتماعسندن قونُشدي و اونلره ﴿رب بله امر اتدي کي ٥ إيچنزدن ربە هديه توپلاين۔ هر کيم إستەيندن ربن هديەسني يعني التن و گوموش و نحاس ٦ و گوو و مور و قرمزي و يوخه کتان و گچي يونو ٧ و قوچن قرمزي اولمش دريسي و يوخه دري و أرز اغاجي ٨ و چراغ و مسح إيچن زَيت و بخور إيچن قوخولر ٩ و جواهر و اِفودن و يلگن اوستنە قيمتلي طاشلر گترسن۔﴾ ددي
١٠ و سزدن بوتون عقلليلر گلسنلر و ربن امر اتديني ياپسنلر۔ ١١ مسکني و چادرني و اؤرتوسنو و چنغاللرني و تختەلرني و سورگولرني و عمودلرني و اياخلرني ١٢ و تابوتي و داينکلرني و رحمت کرسيسني و پردەيي ١٣ و طاولەيي و داينکلرني و بوتون اشيالرني و تقدمه اکمگني ١٤ و ايدنلخ إيچن منارەيي و اشيالرني و ايدنلخ إيچن ياغي ١٥ و بخور مذبحي و داينکلرني و مسح ياغني و قوخلو بخوري و مسکنن قاپيسي إيچن پردەيي ١٦ و ياخمالي قوربانن مذبحني و اونن نحاس شبکەسني و داينکلرني و بوتون اشيالرني و حوضو و اياخني ١٧ و حاوشن پردەلرني و عمودلرني و اياخلرني و دشري قاپينن پردەسني ١٨ و مسکنن و حاوشن موخلرني و اونلرن إيپلرني ١٩ و مقدس ير إيچن اؤرلمش اسبابلري يعني کاهنلِک اتمک إيچن کاهن هارونن مقدس اسبابني و اوغلولرنن کاهنلک اسبابني۔
٢٠ سونرا إسرائيلن اوشاخلرنن بوتون جماعتي موسۍنن اوگندن چيخدي ٢١ و يورگندن و روحندن إستەيان هرکز گلدي و إجتماع چادرنن إيشي و بوتون خزمتي و مقدس اسبابلري إيچن ربن هديەسني گتردي۔ ٢٢ ارککلر و اروادلر و يورگندن إستەيان هرکز گلدي و بورن خزمەلري و کوپەلري و يوزکلري و زنجيرلري و فرقلي فرقلي التنلر گترديلر و هرکز التن هديەلرني ربە تقدم اتدي۔ ٢٣ و هرکزن يانندە ناي بولنديسە يعني گوو و مور و قرمزي و يوخه کتان و گچي يونو و قوچن قرمزي اولمش دريسي و يونلو دري گترديلر۔ ٢٤ و إستەيان هرکز گوموش و نحاس ربە تقدم اتدي و بعزيلرده خزمتن هر إيشي إيچن أرز اغاجي گترديلر۔ ٢٥ و بوتون عقللي اروادلر گندي اللرندن ياپدخلري گوو و موري و قرمزي يوخه کتاني گترديلر۔ ٢٦ و بوتون عقللي اروادلر گچينن قلندن إيپ ياپيوديلر ٢٧ و رئيسلر جواهر طاشلر و اِفود و يلک إيچن قيمتلي طاشلر گترديلر ٢٨ و چراغ إيچن زَيت و مسح ياغي و قوخلو بخور إيچن قوخولر گترديلر ٢٩ و يورکدن إستەيان إسرائيل اوشاخلرنن بوتون ارککلري و اروادلري گندي إستەکلرندن موسۍنِدن ربن امر اتديي هر إيش إيچن ربه تقدمەلر گترديلر۔
٣٠ و موسى إسرائيلن بوتون اوشاخلرنه ﴿باخن، رب يهودا قبيلەسندن اورنن اوغلونو يعني حورن اوغلونن اوغلو بصلئيلي إسمندن چاغرمش ٣١ و اونو اللهن روحندن و عقلدن و فهمدن و علمدن و هر إيشن اوسطالخندن دولدرمش ٣٢ کي يني شيلر ياپمەيي و التن و گوموش و نحاس إيشني ٣٣ و طاش کاسمەيي و نقش اتمەيي و تختە إيشني و هر إيشده إيشلەسن ٣٤ و تعليم ويرمەيي اونن يورگنه قويدي و بونو دان قبيلەسندن اخيساماکن اوغلو اهولياب إيچن ياپدي ٣٥ و اونلرن يورگني عقلدن دولدردي کي اوسطالخدن هر إيشي يعني اويماجلخي و نقش ياپمەيي و گوو و مور و قرمزي و يوخه کتانن دوخومەجلخ اوسطالخني و دوخومەجلخن هر إيشني ياپسنلر و هر صنعتده مخترع اولسنلر۔