٦
اوندن سونرا داوُد إسرائيلن بوتون ساچلمشلرني يعني اوتوز بين ادمي توپلادي۔ ٢ و داوُد قالخدي و يانندەخي بوتون ملتدن برابر، اللهن تابوتني اورادن گترمک إيچن يهوذا بعلەيە گتديلر و اونن إسمي کروبيلر اورتەسندە اوتوران عسکرلرن ربيدي۔ ٣ و اللهن تابوتني بير يني عرابەيە بيندرديلر و اونو جعبەدەکي أبينادابن ائوندن چيخارديلر و أبينادابن اوغلولري عزە و أخيو يني عرابەيي سورديلر۔ ٤ و اونو اللهن تابوتندن برابر جعبەدەکي أبينادابن ائوندن گترديلر و أخيو تابوتن اوگندە گديودي۔ ٥ و داوُد و إسرائيلن بوتون ائوي دە، هر شکل صدر اغاچلرنن چالغيلردن و طنبورلردن و ربابلردن و داووللردن و غربەل داووللردن و زيللردن ربن حضورندە اوينيوديلر۔ ٦ و ناوخت ناخون خرمننە اولاشديلر، عزە اللهن تابوتنە الِني اوزاتدي و اونو توتدي چونکو اوکوزلر سپديلر۔ ٧ بو إيچن رب عزەيە غضبلندي و اللە اونو اوردە خطاسي إيچن ووردي و اوردە تابوتن يانندە اؤلدي۔ ٨ و رب عزەيي ووردي إيچن داوُدن جاني سخلدي و او يرن إسمني بو گونە قدر a«فارص عزە» قويدي۔ ٩ و او گوندە داوُد ربدن قورخدي و ﴿ربن تابوتي بندن نصل گلجي؟﴾ ددي ١٠ و داوُد ربن تابوتني گندي ياننە داوُد شهرنە گترمەيني إستەمادي، بو إيچن داوُد اونو جتيلي عوبيد أدومون ائونە الاتدي۔ ١١ ربن تابوتي جتيلي عوبيد أدومون ائوندە اوچ اي قالدي و رب عوبيد أدومە و اونن بوتون ائونە برکت ويردي۔ ١٢ و قرال داوُدە خبر ويرديلر و ﴿رب عوبيد أدومە و اونن بوتون ائونە اللهن تابوتي إيچن برکت ويردي۔﴾ دديلر، اونن إيچن داوُد گتدي و اللهن تابوتني عوبيد أدومن ائوندن داوُد شهرنە کايفلکدن گتردي۔ ١٣ و ناوخت ربن تابوتني داشيانلر التي ادم گتديلر، داوُد اوکوزلر و شيشمان حيوانلر کاسدي۔ ١٤ و داوُد ربن حضورندە بوتون قواتندن اوينيودي و داوُد کتان اِفود گايمشدي۔ ١٥ و داوُد و إسرائيلن بوتون ائوي ربن تابوتني کايفلک و بورو سَسندن گترديلر۔ ١٦ و ربن تابوتي داوُدن شهرنە گيرديي زمان شاعولن قزي ميکال طاغەدن باخيودي و قرال داوُدن ربن حضورندە أتلمەسني و اوينامەسني گورديندە اونو يورگندە خور صايدي۔ ١٧ و ربن تابوتني گترديلر و اونو داوُدن اونە قورديي چادرندە گندي يرنە قويديلر و داوُد ربن حضورندە يخمالي و سلامت قوربانلري تقدم اتدي۔ ١٨ و داوُد يخمالي و سلامت قوربانلري تقدم اتمکدن سونرا ملتي عسکرلرن ربي إسمندە برکت ويردي۔ ١٩ و بوتون ملتە يعني إسرائيلن هپسنە هم ارککلرە و هم اروادلرە هر بيرنە بير حبە اکمک و بير پارچە ات و بير حبە اوزوم اکمگي پايلاشدي، سونرا بوتون ملت هرکز گندي ائونە گتدي۔ ٢٠ اوندن سونرا داوُد گندي ائونە برکت ويرمک إيچن دؤندي و شاعولن قزي ميکال، داوُدو گورميە چيخدي و ﴿إسرائيلن قرالي ناي قدر عزيزدر کي بو گون چپلاخ دليلرن بيرسي کمي، خزمتچيلرنن ارواد خزمتچيلرن اوگندە گندني چپلاخ اتدي۔﴾ ددي ٢١ و داوُد ميکالە ﴿رب سنن بابانن و اونن بوتون ائونن يرنە بني ساچدي و ربن ملتنە يعني إسرائيلن اوستنە رئيس تعين اتدي، بونن إيچن ربن حضورندە اوينادم۔ ٢٢ و بوندن زيادە گندمي خور ادجم و گندمي خور صاييجم، لکن سنن ددين ارواد خزمتچيلري إيچن محترم اولجم۔﴾ ددي ٢٣ و شاعولن قزي ميکال اؤلومنە قدر چوجوغو اولمادي۔