٣٨
و قوربان مذبحني أرز اغاچندن ياپدي۔ اونن بويو إکي بوچوخ متر و اني دە إکي بوچوخ متردي و مذبح مربع شکلندەدي و يوجەليي بير بوچوخ متردي ٢ و بوينُزلرني دورت قولاغنن اوستندە ياپدي و اونلرده عينا شکلدەدي و اونن اوستنو نحاسدن قاپلادي ٣ و مذبحن بوتون اشيالرني ياپدي يعني قازانلرني و کورکلرني و کاسەلرني و شوکەلرني و اتش قابلرني و بوتون قابلرني نحاسدن ياپدي ٤ و مذبحه نحاسدن شبکەلي بير منقل ياپدي و اونو اشاغيده مذبحن ياننه قويدي کي مذبحن ياريسنه قدر اولسن ٥ و منقلن دورت قولاغنه دورت تانه نحاس الخە ياپدي کي داينکلرن يري اولسنلر ٦ داينکلري أرز اغاچندن ياپدي و اونلرن اوستنو نحاسدن قاپلادي ٧ و داينکلري مذبحن إکي طرفندەکي الخەلردن گچيردي۔ بو داينکلر مذبحي قالدرمخ إيچندي و مذبحي تختەلردن ياپدي و مذبحن إيچي بوشدي۔٨ و حوضو و اياخني نحاسدن ياپدي۔ اونلري إجتماع چادرن قاپيسنده خزمت اتمک إيچن توپلانان اروادلرن اينەلرندن ياپدي۔
٩ و مسکنن حاوشني جنوب طرفه، قبله طرفنه ياپدي و حاوشن پردەلري يوخه و چمرنمش کتاندندي و بويو اللي متردي ١٠ و عمودلري يِرمي تانه و اياخلري دە يِرمي تانەدي و اونلري نحاسدن ياپدي و عمودلرن چنغاللري و سورگولري گوموشدندي ١١ و شمال طرفن پردەلرنن بويو اللي متردي و اونن يِرمي تانه عمودي و يِرمي تانه اياغي نحاسدندي و عمودلرن چنغاللري و سورگولري گوموشدندي ١٢ و غرب طرفنده يِرمي بش مترلِک پردەلر واردي و اونلرن عمودلري اون تانەدي و اونلرن اياخلري دە اون تانەدي و چنغاللري و سورگولري گوموشدندي ١٣ و شرق طرفن يعني گون چيخان يرن پردەلري يِرمي بش متردي ١٤ و قاپينن بير طرفينن پردەلري يدي بوچوخ متردي و عمودلري اوچ تانه و اياخلري دە اوچ تانەدي ١٥ و حاوشن قاپيسنن اوتکي طرفنن پردەلرني إکي طرفدن دە يدي بوچوخ متردي و اونلرن عمودلري اوچ تانه و اياخلري دە اوچ تانەدي ١٦ حاوشن هر طرفندەکي بوتون پردەلر چمرنمش يوخه کتاندندي ١٧ و عمودلرن اياخلري نحاسدندي و چنغاللري و عمودلرن سورگولري دە گوموشدندي و اونلرن اوجلري دە گوموشدن قاپلانمشدي و حاوشن بوتون عمودلري گوموش سورگولرندن بيرلشمشدي ١٨ و حاوشن قاپيسنن پردەسي نقشلي إيشدن و گوو و مور و قرمزي و يوخه چمرنمش کتاندندي۔ اونن بويو اون متردي و يوجەليي حاوشن پردەلري حسبنده إکي بوچوخ متردي ١٩ و اونلرن عمودلري دورت تانەدي و نحاس اياخلري دورت تانەدي و چنغاللري گوموشدندي و عمودلرن اوجلري و سورگولري دە گوموشدندي ٢٠ و مسکنن و حاوشن هر طرفندەکي بوتون موخلر نحاسدندي۔
٢١ مسکنن يعني شهادت مسکنن حسابي بو شکلدەدر۔ اونو لاويلر موسۍنن امرنن حسبنده و هارونن اوغلو کاهن إيثامارندن ياپديلر۔ ٢٢ و يهودا قبيلەسندن بصلئيلن اوغلو يعني حورن اوغلونن اوغلو ربن موسۍيه امر اتدي هر شيي ياپدي ٢٣ و دان قبيلەسندن أخيساماکن اوغلو اهولياب اوندن برابردي۔ أخيساماک اويماجي و مخترع و گوو و مور و قرمزي و نقشلي يوخه کتانلري ياپان بير اوسطادي
٢٤ و تقدمەلردن صرف اولمش بوتون التنلر يعني مقدس يرن إيشندەکي صرف اولمش التن مقدس يرن مثقالنن حسبندە يِرمي دوخوز پارچه و يدي يوز اوتوز مثقالدي ٢٥ و إجتماعدە مقدس يرن مثقالنن حسبندەکي صاييلان گوموشلر يوز پارچەدي و بين يدي يوز يتمش بش مثقالدي۔ ٢٦ يعني هر کشي إيچن بير درهمدي۔ بير درهم مقدس يرن حسبنده يارم مثقالدر۔ بو گوموشلر إجتماعدەکي يِرمي ياشندن يوخاري صاييلان کشيلردن توپلانلمشدي کي اونلرن صاييسي التي يوز اوچ بين بش يوز اللي کشيدي ٢٧ و يوز پارچه گوموش مقدس يرن و پردەلرن اياخلري إيچندي۔ يوز پارچەنن هر پارچەسي بير اياخ إيچندي ٢٨ و عمودلره بين يدي يوز يتمش بش مثقال گوموشدن چنغاللر ياپدي و اونلرن اوجنو قاپلادي و اونلره سورگولر ياپدي۔ ٢٩ و تقدمه ويريلان نحاس يتمش پارچەدي و إکي بين دورت يوز مثقالدي۔ ٣٠ و اوندن إجتماع چادرن قاپيسنن اياخلرني و نحاس مذبحي و نحاس شبکەيي و مذبحن بوتون اشيالرني ياپدي۔ ٣١ و هر طرفدەکي حاوشن اياخلرني و حاوشن قاپيسنن اياخلرني و مسکنن بوتون موخلرني و حاوشن هر طرفندەکي بوتون موخلرني اوندن ياپدي۔