٤
١ ایمدی بن رب ایچون محبوس اولان سزه رجا ایدرم كه دعوت اولندیغڭز دعوته لایق اولدیغی وجه اوزره٢ كمال تواضع و حلم و صبرله یورویوب بری بریكزه محبتله تحمل ایده‌سڭز.٣ و سلامتك بندیله روحك موجب اولدیغی اتحادی حفظ ایتمكه جهد ایده‌سڭز٤ دعوتكزك همان بر امیدینه دعوت اولندیغڭز مثللو جسد بر و روح بر٥ رب بر ایمان بر وافتیز دخی بردر٦ جمله‌نك اوزرنده و جمله‌سی ایله و جمله كزده اوله‌رق جمله‌نك اللهی و پدری بردر٧ اما هر بریمزه مسیحك عطیه‌سنك اولچیسنه كوره عنایت احسان اولندی٨ بوكا بناءً یوكسكه چیقوب اسارتی اسیر ایتدی و ادملره عطیه‌لر ویردی دیو بیورر٩ ایمدی بو چیقمق نه دیمكدر مكر كه اوّلا یرك آشاغیكی محللرینه اینمش اوله١٠ اول اینن و هر شیئی مملو قیلمق اوزره جمله سماواتدن یوقاری چیقان همان بردر١١ كندیسی مقدّسلرك اكمالی مقصدیله خدمتك ایفاسی و مسیحك جسدی معموریتی ایچون١٢ بعضیسنی رسول بعضیسنی پیغمبر بعضیسنی مبشر بعضیسنی دخی چوبان و معلم اولمق اوزره تعیین ایلدی١٣ تا كه جمله‌مز ایمان و ابن اللهی بیلمك اتحادینه كامل ادم اولمق اوزره مسیحك كمالنك قامتی اولچیسنه واصل اوله‌لم١٤ شویله كه بوندن بویله ادملرك حیله‌لری و فندله اضلال ایدیجی دسیسه‌لریله تعلیمك هر بر روز كارندن چالقانان و اوته بری سوروكلنان چوجوقلر اولمایوب١٥ آنجق محبتله حقیقته تابع اوله‌رق هر وجهله انده نما بوله‌لم١٦ یعنی باش اولان مسیحده كه اندن بتون وجود هر یاردم ایدن ارتباط واسطه‌سیله تركیب و تشكیل اولنه‌رق هر قسمنك عملینك مقدارینه كوره جسد محبتله معموریت بولمسی ایچون بیور.١٧ ایمدی بونی دیوب ربده شهادتله نصیحت ایدرمكه سز آرتق سائر طائفه‌لر كندی فكرلرینك باطللغنده یورودكلری كبی یورومیه‌سڭز١٨ چونكه قلبلرینك قاتیلغیله درونلرنده بولنان جهالت سببندن ظلمت انلرك ذهنلرینی قاپلامش اوله‌رق اللهك حیاتندن غریب بولنمش اولدیلر١٩ و هر حسی غائب ایده‌رك طمع ایله هر كونه ناپاكلكی ایشلمك اوزره كندیلرینی فسق و فجوره تسلیم ایتدیلر.٢٠ سز ایسه مسیحی بویله او كرنمدیڭز٢١ مادامكه حقیقت عیساده بولندیغی وجهله ایشیدوب انك طرفندن تعیلم اولندیڭز٢٢ اوّلكی حركتكزه كوره اضلال ایدن شهوتلرنجه فساد بولان اسكی ادمی ترك ایدوب٢٣ عقلكزك روحیله یكیلنه‌رك٢٤ صلاحده و حقیقته عائد قدسیتده اللهك ارادتنه كوره خلق اولنان یكی ادمی كییه‌سڭز٢٥ بو اجلدن یالانی ترك ایدوب سز هر بریڭز قوكشوسی ایله حق اولانی سویلیڭز چونكه بری بریمزك اعضاسی ایز٢٦ غضبه كلدیككزده كناه ایشلمیڭز. غضبڭز اوزرینه كونش باتماسون٢٧ شیطانه دخی محل ویرمیڭز٢٨ سرقت ایدن آرتق سرقت ایتمسون بالعكس محتاج اولانی حصه‌دار ایتمكه مقتدر اولمق اوزره اللریله ایو ایش ایشلیه‌رك امك چكسون٢٩ آغز كزدن بر فنا سوز اصلا چیقماسون فقط ایشیدنره نعمت ویرمك اوزره مقتضی اولان معموریت ایچون خیرلیسی نه ایسه انی سویلیڭز٣٠ و اللهك روح القدسنی محزون ایتمیڭز كه انكله سز فدیه گونی ایچون مهرلندیڭز٣١ هر آجیلق و خشم و غضب و باغرش و كفر هر كوتولكله برابر سزدن دفع اولنسون٣٢ و بری بریكزه حلیم و شفیق اولوب الله دخی مسیح واسطه‌سیله سزی عفو ایلدیكی كبی یكدیكر كزی عفو ایدڭز.