٦
إسرائيلن اوشاخلري مصرن يرندن چيخدخدن دورت يوز سکسان سنە سونرا، سُليمانن إسرائيلن اوستنە حکومتنن دوردنجي سنەسندە و إکنجي اولان زيو ايندە، او ربن ائوني ياپميە باشلادي۔ ٢ و قرال سُليمانن ربە ياپديي ائون اوزونلغو، اوتوز متر و اني، اون متر و يوجەلگي، اون بش متردي۔ ٣ و ائون معبدنن اوگندەکي سالونن اوزونلغو، معبدن اني حسبندە اون متر و ائونن اوگندە، اني بش متردي۔ ٤ و ائو إيچن شبکەلي طاغەلر ياپدي۔ ٥ و ائون دووارنن اوستنە هر طرفدن قاتلر ياپدي، يعني ائون دووارنن هر طرفندە، هم معبدە هم دە محرابدە هر طرفدە غرفەلر ياپدي۔ ٦ اشاغيدەکي غرفەنن اني، إکي بوچوخ متر و اورتەدەخينن اني اوچ متر و اوچونجي قاتن اني اوچ بوچوخ متردي، چونکو دشريدن ائون هر طرفندن داياخلر قويدي کي اغاچلر ائون دووارلرنە دايماسن۔٧ ائون ياپلمەسي إيچن معملدە حاضرلانمش طاشلردن ياپلمشدي، بلە کي ائوي ياپديي زمان، چکچ و پالطە و دمر شيلرن سَسي هيچ دويلمادي۔ ٨ اورتە غرفەلرن قاپسي، ائون صاغ طرفندەدي و اورادن دولانماچ مردوانلردن اورتە قاتە و اوچنجي قاتە قدر يوخاري گديوديلر۔ ٩ و ائوي ياپدي و تمام اتدکدن سونرا، ائوي داياخلردن و أرز اغاچلرنن تختەلرندن اؤرتدي۔ ١٠ و بوتون ائون اوستنە هر بيرنن يوجەلگي إکي بوچوخ متر اولان غرفەلري ياپدي و اونلري أرز اغاچلرنن داياخرندن ائوە ياپشتردي۔
١١ و ربن سوزو سُليمانە إيندي و ١٢ ﴿سن کي بو ائوي ياپيون، اگر قانونلرمدە قالديسن و حکملرمدن اطاعت اتديسن و بوتون امرمي حفظ اتديسن و اونلردە يريديسن، بن دە بابان داوُدە سويلەديم سوزو سندن ثابت ادجم۔ ١٣ و إسرائيل اوشاخلرندن برابر اوتورجم و ملتم إسرائيلي ترک اتميجم۔﴾ ددي
١٤ او زمان سُليمان ائوي ياپدي و تمام اتدي۔ ١٥ و ائون دووارلرنن إيچ طرفني أرز اغاچلرنن تختەلرندن ياپدي، يعني ائون يرندن تا دووارن يوخارسنە قدر إيچ طرفندن اغاچدن اؤرتدي و ائون يرني صدر تختەلرندن اؤرتدي۔ ١٦ و ائون ارخەسنن اون متر أرز اغاچلرنن تختەلرندن، يردن تا باشە قدر دووارلر ياپدي و اونلري إيچندن إيچ محرابە طرف، يعني قدسلرن قدسي إيچن ياپدي۔ ١٧ و ائو يعني محرابن اوگندەکي معبد يرمي متردي۔ ١٨ و ائون إيچندەکي أرز اغاچلري بال قاباقي و اچلمش چيچکلر شکلي قازلمشدي، بلە کي هر شي أرز اغاچندندي و هيچ طاش گورکمادي۔ ١٩ و ربن انلاشمە تابوتني قويمخ إيچن، ائون إيچندە محراب ياپدي۔ ٢٠ و ائون إيچندەکي محرابن اوزونلغو اون متر و اني اون متر و يوجەلگي اون متردي و اونو صافي التندن قاپلادي و مذبحي أرز اغاچدن قاپلادي۔ ٢١ و سُليمان ائون إيچني صافي التندن قاپلادي و محرابن اوگنە التن زنجيرلر گچردي و اونو التندن قاپلادي۔ ٢٢ و بوتون ائو تمام اولانە قدر، ائون هپسني التندن قاپلادي و محرابن اوگندەکي بوتون مذبحي التندن قاپلادي۔
٢٣ و محرابدە زيتون اغاچندن، إکي کروبي ياپدي کي هر بيرنن بويو بش متردي۔ ٢٤ کروبينن بير قنادي إکي بوچوخ متر و اوتگي قنادي إکي بوچوخ متردي و بير قنادنن اوجوندن اوتگي قنادنن اوجونە قدر بش متردي۔ ٢٥ إکنجي کروبي بش متردي و إکي کروبينن اؤلچوسي و شکلي بيردي۔ ٢٦ بير کروبينن يوجەلگي بش متردي و اوتکي کروبي دە عينادي۔ ٢٧ و کروبيلري إيچريدەکي غرفەنن اورتەسنە قويدي و کروبيلرن قنادلري اچخدي، بلە کي بيرنن قنادي دووارە داييودي و اوتکي کروبينن قنادي باشخە دووارە داييودي و اونلرن قنادلري ائون اورتەسندە برابرنە داييودي۔ ٢٨ و کروبيلري التندن قاپلادي۔
٢٩ و ائون هر طرفني يعني إيچني و دشني بوتون دووارلرني کروبيلرن و خورما اغاچلرنن و اچلمش چيچکلرن نقشلرني، نقش اتدي۔ ٣٠ و ائون يرني إيچدن و دشدن التندن قاپلادي۔
٣١ محرابن قاپسي إيچن زيتون اغاچندن إکيلي بير قاپي ياپدي کي قاپينن اوستنو و دورت قراغي بش کوشەليدي۔ ٣٢ و زيتون اغاچندن ياپلان إکي قنادلي قاپينن اوستندە، کروبيلرن و خورما اغاچلرنن و اچلمش چيچکلرن نقشلرني، نقش اتدي و کروبيلرن و خورما اغاچلرنن اوستنو التندن قاپلادي۔ ٣٣ و هم دە معبدن قاپسي إيچن، زيتون اغاچندن دورت کوشەلي دورت قراغلرني ياپدي۔ ٣٤ و بو قاپينن إکي قنادي صدر اغاچندندي، بير قنادي إکيە قاتلانيودي و اوتکي قناد دە إکيە قاتلانيودي۔ ٣٥ و اونلرن اوستندە، کروبيلرن و خورما اغاچلرنن و اچلمش چيچکلرن نقشلرني، نقش اتدي و اونلرن اوستنو نقشلرن حسبنە التندن قاپلادي۔ ٣٦ و إيچردەکي حاوشن دووارلرني، اوچ قات کاسلمش طاشلردن و بير قات أرز اغاچلرنن داياخلرندن ياپدي۔